კავკასიის საერთაშორისო უნივერსიტეტის საკონფერენციო დარბაზში, ალკალას უნივერსიტეტის პროფესორს - კამბას სანტოს მიგელ ფელიპეს, უნივერსიტეტის განვითარებაში შეტანილი განსაკუთრებული წვლილისთვის საპატიო დოქტორის წოდება ოფიციალურად მიენიჭა.
ცერემონია კსუ-ს რექტორმა - კახაბერ კორძაიამ გახსნა და შეკრებილ საზოგადოებას ალკალას უნივერსიტეტის შესახებ მოკლედ მოუთხრო. მისი თქმით, კსუ-ს რამდენიმე ათეულწლიანი ისტორიის მანძილზე, საპატიო დოქტორის წოდების მინიჭების ცერემონია მეშვიდედ ტარდება, რაც თავისმხრივ უკვე მეტყველებს ამ ტიტულის მნიშვნელობაზე.
კსუ-ს სამეცნიერო კვლევების დეპარტამენტის უფროსმა - სესილი გოგიბერიძემ შეკრებილ პროფესორებს, კსუ-ს ხელმძღვანელობას, ადმინისტრაციის წარმომადგენლებს, სტუდენტებსა და მოწვეულ სტუმრებს - ესპანელი პროფესორის ბიოგრაფიისა და მოღვაწეობის ძირითადი მომენტები გააცნო.
აუდიტორიის წინაშე მისასალმებელი სიტყვით, ასევე, კსუ-ს კანცლერი - ვახტანგ წივწივაძე წარსდგა და აღნიშნა, რომ ენობრივი ბარიერი იმ მეგობრობისა და ურთიერთობის ფონზე რაც საპატიო დოქტორსა და კსუ-ს შორის ჩამოყალიბდა, დაბრკოლებას სრულებით არ წარმოადგენს და მიგელ კამბას აღნიშნული ჯილდოს მინიჭება პირადად მიულოცა.
ღონისძიებაზე მისასალმებელი სიტყვით, ბიზნესის ადმინისტრირების ინგლისურენოვანი საბაკალავრო-საგანმანათლებლო პროგრამის ხელმძღვანელი - კახაბერ ჯაყელი და ტურიზმის საბაკალავრო-საგანმანათლებლო პროგრამის ხელმძღვანელი - ლალი მიქელაძეც წარსდგნენ.
კსუ-ს წარმომადგენლების მისალოცი გამოსვლების შემდეგ, შეკრებილ აუდიტორიას, თავად კამბას სანტოს მიგელ ფელიპემ მიმართა და უნივერსიტეტის ხელმძღვანელობას გამოცხადებული ნდობისთვის, მხარდაჭერისა და დაფასებისთვის მადლობა გადაუხადა.
საზეიმო ცერემონიის შემდეგ, ესპანელ სტუმარს, კსუ-ს მარან ,,კოლხის“ დათვალიერების საშუალება მიეცა, სადაც უნიკალური საწნახელი, ქვევრები, ენოთეკა და ლაბორატორია მოინახულა. საპატიო დოქტორსა და ესპანეთიდან დელეგაციის წარმომადგენლებს, კსუ-ს კანცლერმა სამახსოვრო საჩუქრები გადასცა.
შეგახსენებთ, რომ კავკასიის საერთაშორისო უნივერსიტეტსა და ალკალას უნივერსიტეტს ურთიერთთანამშრომლობის რამდენიმე წლიანი ისტორია აქვთ და ამ ხნის მანძილზე, მხარეებმა მრავალი ერთობლივი პროექტი და გაცვლითი პროგრამა განახორციელეს.
ადრესატი
თქვენი სახელი
ელ-ფოსტა
თემა
შეტყობინება
