ტურიზმის სპეციალობის სტუდენტებმა სასწავლო პრაქტიკა ბორჯომის ელიტარულ, ხუთვარსკვლავიან სასტუმროში გაიარეს

2016 წლის შემოდგომა-ზამთრის სემესტრის ბოლოს,  29 დეკემბრიდან - 8 იანვრის ჩათვლით, კსუ-ს ტურიზმის საგანმანათლებლო პროგრამის მეორე და მეოთხე კურსის ათმა სტუდენტმა სასწავლო პრაქტიკა ელიტარულ, ხუთვარსკვლავიან სასტუმრო - რიქსოს ბორჯომში-  (hotel Rixos Borjomi) გაიარა.

ისინი სასტუმროში, პროგრამის ხელმძღვანელის - ლალი მიქელაძის ინიციატივითა და რეკომენდაციით მოხვდნენ. აღნიშნულ აქტივობაში ჩართვა ტურიზმის სპეციალობის საბაკალავრო პროგრამის იმ სტუდენტებს  შეეძლოთ, რომლებიც  მაღალი აკადემიური მოსწრებით, ენთუზიაზმით, საქმისადმი პასუხისმგებლობისა და ინტერესის გრძნობით გამოირჩეოდნენ.

ამ უნარებისა და თვისებების მიხედვით შეირჩნენ ნათია სეფიაშვილი, სალომე შამათავა, ეთო გრიგალაშვილი, ნინო კვარაცხელია, ანასტასია ხაჭიპერაძე, ნინო გურეშიძე, მინდია შავაძე, მანუჩარ ირემაძე და გიორგი ნადარეიშვილი.

ტურიზმის სპეციალობის სტუდენტები და პროგრამის მონაწილეები - ნათია სეფიაშვილი და სალომე შამათავა იმ ათდღიან სასწავლო პრაქტიკას იხსენებენ, რომელიც მათ ელიტარულ სასტუმროში გაატარეს:

ნათია: - იმ პერიოდს, რომელიც სასტუმროში გავატარეთ, დღემდე სასიამოვნოდ ვიხსენებ. გამოცდილება, რომელიც ამ პრაქტიკის დროს შევიძინე - შეუფასებელია. სალომე: - პირველ დღეს ყველანი დაძაბულები და დაბნეულები ვიყავით, თუმცა თანამშრომლებისა და მენეჯერის ძალისხმევის შედეგად საქმეს ალღო მალევე ავუღეთ, ჩვენთვის შექმნილ შედარებით მარტივ გრაფიკზეც უარი ვთქვით და გამოცდილი თანამშრომლების  მსგავსი დატვირთვით დავიწყეთ მუშაობა.

კსუ-ს სტუდენტები სასწავლო პრაქტიკის დროს, სასტუმროს  კვებისა და სასმელების განყოფილებაში იყვნენ მიმაგრებულნი, თუმცა პარალელურად, მათ  საშუალება ჰქონდათ სხვა მომსახურების სფეროსაც დაკვირვებოდნენ და ამ მიმართულებითაც მოესინჯათ ძალები.

ნათია: - პოტენციურ დამსაქმებლებთან გასაუბრების დროს, ის ფაქტი, რომ მშობლიური უნივერსიტეტიდან მე ამ სასტუმროში გამიშვეს სასწავლო პრაქტიკაზე და აღნიშნული მიმართულებით გამოცდილება დამიგროვდა,  ჩემს კანდიდატურაზე ყოველთვის დადებითად აისახება.

სალომე: - იმ ნაკადს, რომელიც წელს ფაკულტეტიდან  შეირჩევა და რიქსოს ბორჯომში წავა, გულწრფელად ვულოცავ და ვეტყვი, რომ ამ პრაქტიკის შემდეგ ისინი დიდ გამოცდილებას შეიძენენ.

2016 წლის ბოლოს, ტურიზმის საბაკალავრო-საგანმანათლებლო პროგრამის სტუდენტების ჯგუფს, რომელმაც ბორჯომის ელიტარულ სასტუმროში სასწავლო პრაქტიკა გაიარა - პროგრამაში წარმატებით მონაწილეობის დამადასტურებელი სერთიფიკატები დაურიგდა.

შეგახსენებთ, რომ 2017 წლის ბოლოს, რიქსოს ბორჯომში, ტურიზმის სპეციალობის 10 სტუდენტი სასწავლო პრაქტიკით ისევ გაიგზავნება.