კსუ-ს თანამშრომლობა ესპანეთის უნივერსიტეტებსა და პარტნიორ ორგანიზაციებთან ახალ ეტაპზე გადადის

კავკასიის საერთაშორისო უნივერსიტეტის ერთ-ერთ პრიორიტეტს წარმოადგენს ინტერნაციონალიზაციის განვითარება და ამ მიმართულებით მთელი წლის განმავლობაში აქტიურად თანამშრომლობს საერთაშორისო პარტნიორებთან.

ესპანეთის პარტნიორ უნივერსიტეტებსა და ორგანიზაციებთან თანამშრომლობა ამის ნათელი მაგალითია. წინა წლების წარმატებული გაცვლითი პროგრამების და პროექტების ნუსხას კიდევ რამდენიმე ახალი შესაძლებლობა დაემატა.

პრაქტიკები ესპანეთის კერძო თუ საუნივერსიტეტო მარნებში მევენახეობა-მეღვინეობის ფაკულტეტის სტუდენტებისთვის.

ამიერიდან, კავკასიის საერთაშორისო უნივერსიტეტის მევენახეობა-მეღვინეობის ფაკულტეტის სტუდენტებს საშუალება ექნებათ მოკლევადიანი და გრძელვადიანი (1 კვირიდან 1 წლამდე) პრაქტიკები გაიარონ ესპანეთის კერძო თუ საუნივერსიტეტო მარნებში, მაგალითად ბურგოსის სახელმწიფო უნივერსიტეტი, ლა რიოხას სახელმწიფო უნივერსიტეტი, კოღოიუდოს კერძო მარანი - Rio Negro, ქალაქ მარბეიას მარანი - Viña Tamisa, ქალაქ ბაიადოლიდთან სოფელ ელ პეგოს მარანი - Anciano, მადრიდის კვლევისა და ინოვაციის ცენტრი ბიო მეღვინეობის მიმართულებით - IMIDRA და სხვა. პრაქტიკის ობიექტის შერჩევა მოხდება შესაბამისი სეზონის და მიმართულების მიხედვით. მოკლევადიანი (ერთი კვირიდან ერთ თვემდე) პრაქტიკის არჩევის შემთხვევაში კავკასიის საერთაშორისო უნივერსიტეტი უზრუნველყოფს სტუდენტს საცხოვრებლით. გრძელვადიანი პრაქტიკის არჩევის შემთხვევაში სტუდენტი თავად ფარავს საცხოვრებლის ხარჯებს. პრაქტიკების წარმატებით დასრულების შემდეგ სტუდენტი მიიღებს შესაბამისი პრაქტიკის ობიექტისა და კავკასიის საერთაშორისო უნივერსიტეტის სერტიფიკატს.

სტუმარი სტუდენტის პროგრამა ბურგოსის და ლა რიოხას უნივერსიტეტებში.

კავკასიის საერთაშორისო უნივერსიტეტის სტუდენტს ან კურსდამთავრებულს შეუძლია ისარგებლოს სტუმარი სტუდენტის სტატუსით და ერთი თვიდან ერთი წლის ვადით ისწავლოს ბურგოსისა და ლა რიოხას უნივერსიტეტებში. ამ შემთხვევაში, სტუდენტი ან კურსდამთავრებული ირჩევს შესაბამის საგნებს და იხდის მათ საფასურს კრედიტული პრინციპით. სტუმარმა სტუდენტმა უნდა აიღოს მინიმუმ ორი ან სამი კრედიტის საგანი. ამასთანავე, სტუმარი სტუდენტი სარგებლობს ყველა იმ პრივილეგიით რითაც ჩვეულებრივი წესით ჩარიცხული სტუდენტები სარგებლობენ, მაგალითად, სტუდენტური ბარათი, სატრანსპორტო ფასდაკლების ბარათი, სამუშაო უფლება - დღეში 4 საათი და სხვა. სტუმარი სტუდენტი საცხოვრებელ ხარჯებს თავად ანაზღაურებს, თუმცა ოპტიმალური ვარიანტების შერჩევაში მათ დაეხმარება კსუ-ს წარმომადგენელი ესპანეთში. საცხოვრებელი საშუალოდ 200-დან 250 ევრომდე უჯდებათ სტუდენტებს.

აღსანიშნავია, რომ კავკასიის საერთაშრისო უნივერსიტეტში გაიხსნა ესპანური ენის კურსები, რომელიც ისწავლება ბურგოსის უნივერსიტეტის პროგრამით. კურსის ხანგრძლივობა 3 თვეა, რომლის წარმატების დასრულებისა და გამოცდის ჩაბარების შემდეგ სტუდენტს ენიჭება კავკასიის საერთაშორისო უნივერსიტეტის და ბურგოსის უნივერსიტეტის სერტიფიკატი. ენების კურსების წარმატებულ მონაწილეებს საჩუქრად გადაეცემათ ბურგოსის უნივერსიტეტის 6 კრედიტი. ე.ი. აღნიშნულ სტუდენტებს შესაძლებლობა ექნებათ მოცემული 6 კრედიტი გამოიყენონ სტუმარი სტუდენტის პროგრამის არჩევის შემთხვევაში. ამ დროს, ესპანეთში სწავლისას მათ აღარ მოუწევთ არჩეული 6 კრედიტის საფასურის გადახდა.

სტუმარი სტუდენტის პროგრამის დასრულების შემდეგ სტუდენტი ან კურსდამთავრებული მიიღებს სტუმარი სტუდენტის სერტიფიკატს შესაბამისი უნივერსიტეტიდან.

ორმაგი დიპლომის სამაგისტრო პროგრამა მევენახეობა-მეღვინეობის ფაკულტეტის სტუდენტებისთვის.

კავკასიის საერთაშორისო უნივერსიტეტი ლა რიოხას უნივერსიტეტთან ერთად მუშაობს ორმაგი დიპლომის სამაგისტრო პროგრამის პროცედურული საკითხების დასრულებისთვის. აღნიშნული პროგრამის ჩაშვებისთანავე, კსუ-ს სტუდენტებს შესაძლებლობა ექნებათ დროის უმოკლეს ვადებში ისწავლონ და მიიღონ როგორც კსუ-ს, ისე ლა რიოხას უნივერსიტეტის დიპლომი მევენახეობა-მეღვინეობის მიმართულებით.

კავკასიის საერთაშორისო უნივერსიტეტი არ ჩერდება აღნიშნულ პროექტებზე და განაგრძობს მოლაპარაკებებს ახალი პროგრამების განვითარების მიმართულებით არსებულ და ახალ პარტნიორებთან.