კავკასიის საერთაშორისო უნივერსიტეტსა და კომპანია „მტევინოს“ შორის ურთიერთთანამშრომლობის მემორანდუმი გაფორმდა

1 ნოემბერს, კავკასიის საერთაშორისო უნივერსიტეტსა და ალკოჰოლური სასმელების კომპანია „მტევინოს“ შორის ურთიერთთანამშრომლობის მემორანდუმი გაფორმდა.

მემორანდუმი, რომელსაც კავკასიის საერთაშორისო უნივერსიტეტის კანცლერმა ვახტანგ წივწივაძემ და „მტევინოს“ წარმომადგენელმა ნიკა ზაუტაშვილმა მოაწერეს ხელი, ითვალისწინებს ურთიერთთანამშრომლობას მევენახეობა-მეღვინეობის ფაკულტეტის სტუდენტთა სასწავლო პრაქტიკის გავლის მიმართულებით, რითაც ხელი შეეწყობა სტუდენტების კრეატიულ აზროვნებას, კონკრეტული სიტუაციების სიმულაციების შექმნას, სამუშაო სპეციფიკაში გარკვევას, სამეცნიერო-კვლევით საქმიანობაში დახმარებას და თეორიული ცოდნის პრაქტიკული გამოყენების ათვისებას. მემორანდუმის მიზნებისათვის ორგანიზაცია უზრუნველყოფს შემდეგი მომსახურეობის გაწევას: საწარმოო პრაქტიკის გასატარებლად საკუთარ საწარმოს ტერიტორიაზე მიიღებს უნივერსიტეტის მიერ სასწავლო პრაქტიკაზე გაგზავნილ სტუდენტებს; პრაქტიკანტებს დაუნიშნავს მენტორს და უზრუნველყოფს პრაქტიკის მაღალ დონეზე გატარებას უნივერსიტეტის მიერ მიწოდებული პრაქტიკის სილაბუსის შესაბამისად; პრაქტიკის დასრულების შემდეგ თითოეულ სტუდენტზე გასცემს ბეჭდით დამოწმებულ დასკვნა–დახასიათებას.

მემორანდუმი, ასევე, ითვალისწინებს ინფორმაციებისა და გამოცდილებების გაცვლა-გაზიარებას; ერთობლივი კოლოქვიუმების, სემინარების, სამეცნიერო კონფერენციებისა და სტაჟირებებს სწავლების მეთოდების სრულყოფა-განვითარების პრობლემურ, აგრეთვე სხვა აქტუალურ საკითხებზე; თანამშრომლობას ევროპულ და მსოფლიო საგანმანათლებლო სტანდარტებზე ორიენტირებული ერთობლივი სასწავლო და სამეცნიერო-კვლევითი პროგრამების შემუშავებისა და მათი სასწავლო პროცესებში დანერგვისათვის; სტუდენტებისა და აკადემიური პერსონალის სამეცნიერო, შემოქმედებითი და სხვა სახის შეხვედრებით წახალისებას და წარჩინებულ სტუდენტთა დასაქმებას.