კსუ-ს საფეხბურთო გუნდი ბიზნესის ჩემპიონთა ლიგაზე ასპარეზობს

კავკასიის საერთაშორისო უნივერსიტეტის საფეხბურთო ნაკრები ბიზნესის ჩემპიონთა ლიგის მეცხრე სეზონის დებიუტანტი გუნდია.

23 ოქტომბერს თამაში სუპერლიგა B-სა და A-ს გუნდებმა გამართეს.

სუპერლიგა B-ს მოთამაშე კსუ-ს გუნდი პირველ შეხვედრაში vivus.ge-ს დაუპირისპირდა.

შეხვედრა საკმაოდ დაძაბული აღმოჩნდა. ანგარიში მეტოქე გუნდის მოთამაშე გიგი მამალაძემ გახსნა, თუმცა საპასუხო გოლი კსუ-ს ფეხბურთელმა გიორგი კვანტალიანმა მალევე გაიტანა და პირველი ტაიმი ანგარიშით 1:1 დამთავრდა.

შეხვედრის მეორე ნაწილში თითო ქულა საკუთარ გუნდებს ზურაბ ძაგანიამ და ნიკა ბუგიაშვილმა შემატეს. საბოლოოდ, თამაში ანგარიშით 2:2 დასრულდა.

თამაშზე უნივერსიტეტის (კსუ) გულშემატკივართა რიგებში ადმინისტრაციის წარმომადგენლებიც იყვნენ.

ბიზნესის ჩემპიონთა ლიგის ისტორიაში პირველად, სუპერლიგა B-ს წრიული ეტაპის ორი ტურის შეხვედრებს ზესტაფონის სპორტის სასახლე უმასპინძლებს.  

მორიგ მატჩს კავკასიის საერთაშორისო უნივერსიტეტი Funday entertainmet-ის გუნდთან გამართავს.

ჩემპიონატში, რომელიც ტრადიციულად, ექვსი სხვადასხვა ლიგის ფორმატში იმართება, 60-მდე გუნდი მონაწილეობს.

შეგახსენებთ, რომ ბიზნესის ჩემპიონთა ლიგის გენერალური პარტნიორია „ვითიბი ბანკი“, ტექნიკური პარტნიორი ესპანური სპორტული ბრენდი JOMA.